كلمة الرئيس السيسي خلال تفقده الأكاديمية العسكرية 10/1/2025

السلام عليكم ورحمة الله وبركاته.. التحية والاحترام ليكم جميعا.. التحية والاحترام ليكم جميعا.. وكان لازم النهار ده، بفضل الله سبحانه وتعالى، نكون في زيارة للأكاديمية، إحنا صحيح حضرنا احتفال تخرج من الأكاديمية هنا، ولكن دي أول مرة نزور الأكاديمية في خلال الأنشطة اليومية والعادية بتاعتها.

خلوني أرحب بالدفعة الجديدة، دفعة الطلبة الجدد، وأتمنى لهم التوفيق، وأنا عارف إن فترة التدريب المركز ال.. بتبقى للأكاديمية، سواء للطلبة الجدد أو حتى للطلبة القدامى، بتستمر 3 شهور.

وهنا اسمحوا لي بس أقول حاجة مهمة قوي، آآ نبقى عارفينها كلنا، لازم تكونوا عارفين كويس قوي إن البرامج اللي إحنا بنعملها هنا ده في دراسات بتتعمل من كليات الاجتماع وعلم النفس، وبتصمم البرنامج عشان يبقى ظابط اللي ها يتم إن شاء الله بنجاح تخرجه من هنا، يبقى شخصية متوازنة، متعلمة، قادرة على أداء المهارات المختلفة يعني.

أنا بس بقول كدا لكم جميعا عشان الطلبة الجدد ممكن تكون اللي بيشوفوه هنا مختلف عن اللي هم اتعودوا عليه، لكن تأكد إن ده معمول من أجلك عشان يساعدك في مهمتك الجديدة.

زي ما قلت لكم مرة قبل كدا إن أشرف مهمة، أي إنسان ينفذها، هي إن يحمي وطنه ويحمي بلده ويحمي عرضه ويحمي ناسه، ودي المهمة اللي إحنا مكلفين بيها، اللي إحنا دخلنا من أجلها، والتحقنا بالقوات المسلحة عشان آآ نقوم بهذا الدور، وعشان كدا هو زي ما قلت لكو هو أشرف دور ممكن أي إنسان يتولاه وهو ليه قيمة كبيرة جدا عند ربنا سبحانه وتعالى لو إحنا يعني كان الهدف منه مرضاة الله سبحانه وتعالى، وحماية وطنا، وإحنا بنتكلم في بلد بيسكنها تقريبا 120 مليون بين عدد سكانها وبين الضيوف اللي موجودين عندهاز

كتير قوي إن ال 120 مليون دول يبقوا في أمن وأمان وسلام لإنسان ولمواطنين ولشباب ولقوات مسلحة ساهرة على أمنهم وسلامتهم. ده اللي إحنا بنقوم بيه هنا عشان باختصار شديد تبقوا عارفين إن أي جهد إنت بتبذله، أنا عارف اليوم بيبدأ بدري قوي، وإحنا زي ما قلت كدا حبينا نقول إن الشخصية شخصية متوازنة جدا، ما فيش أي شكل من أشكال الاستعلاء، حتى الاستعلاء بالدين، حتى الاستعلاء بالدين، ده مش موجود بينا، ومش مطروح إنه يبقى موجود بينا، أي استعلاء بقى في الشخصية المتوازنة المعتدلة المتسامحة القادرة.

 مش معنى إنك إنت متوازن ومتسامح و... إنك إنت مش قادر، لأ. ده بالعكس، ده كل ما تزيد قدرتك، كل ما يزداد توازنك، كل ما تزداد معرفتك، المفروض، كل ما يزداد تواضعك.

فـ.. سعيد بيكم، وبتمنى لكم التوفيق، ويمكن تكونوا بردو عايزين تطمنوا على أحوالنا وأحوال مصر، وأحوال المنطقة حتى. في تطورات كتير جدا بتحدث في منطقتنا، وإنتو متابعين، سواء كان الأحداث الحرب في غزة، أو التطورات اللي موجودة على حدودنا المختلفة، أو حتى في المنطقة، ودي بتستدعينا إن إحنا دايما نبقى في أعلى درجات الفهم الأول، والوعي، ثم الاستعداد. الفهم والوعي والاستعداد، ده أمر في منتهى الأهمية، ولن يتم اكتسابه إلا بالعمل والعمل الشاق الحقيقة.

وإوعى، ليكو كلكو، ولنفسي كمان، إوعى يفوتك يوم ما تستفيدش من هذا اليوم، أعوى يفوتك يوم ما تستفيدش في هذا ال.. آه في برنامج معمول، والبرنامج ده معمول علشان، مصمم عشان زي ما قلت كدا، حسب السلاح وحسب التخصص، يساعد في إعدادك وتأهيلك، ولكن إنت كمان على المستوى الشخصي لك مبادئتك إنك إنت تفكر دايما إن يبقى إنت بتطور في قدراتك وفي مهاراتك، وكل يوم بيعدي عليك إوعى ما تستفيدش منه.

مش ها أوصيكم، الطلبة القدامى طبعا، إحنا لينا تقاليد، ولينا قيم، بنتعامل بيها مع بعضنا البعض، كلها مبنية على الاحترام المتبادل، الاحترام المتبادل والاحترام الشديد كمان، ثم ال.. الثقة في بعضنا البعض، ثم، يعني إن إحنا دايما الكبير أو القديم زي ما بنقول عندنا عندنا بيبقى بيتابع، بيشرف، بيساعد ال.. الطالب الأحدث منه، بمنتهى الاحترام زي ما بقول بين، بينا وبين بعضنا البعض يعني.

الجهد اللي إنتو بتعملوه جهد مقدر جدا، قعدتكم هنا، ال 3 شهور، وبرنامجكو اللي بيبدأ تقريبا الساعة 4 الصبح، ده برنامج قوي جدا، ومقدر جدا، وأنا الحقيقة يعني، عندي ثقة كبيرة جدا فيكو، إنتم الجيل ال.. جيل الشباب.. اللي هو الدنيا كلها قدامه.. ربنا يديكو العمر والصحة، ويوفقكم.

فـ.. استفيدوا من الوقت ده، زي ما بقول كدا، إنتم الجيل اللي ها يتولى مسؤولية أمن وحماية الدولة المصرية، وعشان كدا بقول لكم إن إحنا لم نبخل لا بعلم ولا معرفة ولا بخبرات ولا بنظم تعليم.. على أعلى مستوى عملناها، وقدمناها لكم، من أجل في النهاية يبقى في الإنسان، الظابط الخريج من هنا، ظابط كفؤ وقادر، بكل ما تعنيه هذه الكلمة يعني.

تحياتي ليكم مرة تانية، و.. يعني على فترات كدا إن شاء الله أجيلكم أطمن عليكم، لأن أنا ببقى سعيد قوي وأنا في وسط شباب مصر، شباب مصر  الكفؤ القوي القادر الواعي الفاهم، الحريص على بلده وأمنها وسلامتها.

اطمنوا الأمور ماشية بخير الحمد لله رب العالمين، وكل الصعوبات اللي إحنا بنقابلها خلال، يعني إحنا بقى لنا دلوقتي تقريبا 4 سنين بنقابل ظروف قاسية، اعتبارا من كورونا، والحرب الروسية يمكن، و.. حرب غزة كمان، والظروف الصعبة اللي بتمر زي ما قلت كدا في حدودنا المختلفة، لكن بالرغم من كدا الحمد لله رب العالمين ربنا بيوفقنا، وهايوفقنا أكتر إن شاء الله كل ما نبذل جهد ونصبر ونعمل، ونعمل.

 آآ كل سنة وإنتو طيبين، مرة تانية برحب بالطلبة الجدد، أهلا وسهلا بيكم، ربنا يوفقكم، المدة اللي إنتو بتقضوها دي مدة قد تكون بالنسبة لكو جديدة، لكن صدقوني، بعد شوية، وبعد يمكن ما تخلص المدة دي تماما، إنت ها تقول دلوقتي إمتى تخلص، لكن ها تخلص، فماتقلقوش، بس تحملوا واستفيدوا من ال، من التجربة الجديدة دي في حياتكم، وربنا يا رب يوفقكم. وتحياتي طبعا لأسركم، كل سنة وإنتو طيبين، وربنا يوفقكم، شكرا جزيلا.

ألقيت الكلمة في القاهرة، حيث تفقد الرئيس عبد الفتاح السيسي الأكاديمية العسكرية المصرية، وألقى كلمة أمام الدفعة الجديدة من طلاب الأكاديمية.